Oftovardeš procentia taro sa barabutne 34.000 Roma so sine anketirime taro engja thema- membria an i Europakiri Unia sine an o riziko taro čorolipa, a o thema- membria na resen te keren integracia odole minjoriteteske , sikavena o rezultatia taro rodaripa tari Agencia e EU-ske tari fundavno niamia (FRA).
Aso o raportia vash 2016 berš paše 1/3 taro anketirime Roma dživdinena bizo pani an o ple khera , a 46 % nane olen toaleti, tuš thaj nanjaribaskoro than khere.
I marginalizacia thaj diskriminacia e majbare minjoriteteske an i Europa si seriozno nasukcesi an o kanonia thaj politike an o EU thaj olengere thema- membria – vakergja o direktori e Agenciake o Majkl O’Flaharti.
I anketa sikavela kote 1/3 taro romane čhave jekh drom an o masek sovena bokhale, a 50% taro Roma ko baripa maškar 6 thaj 24 berša na džan an i škola.
Paše 40 % taro anketirime vakergje kaj hošinena pe diskriminirime kana rodena buti, kherutnipa, sastipaskiri protektiva thaj edukacia.
An o raporti si notirime lačharipe an i paralela e situaciajaj e Romencar an o 2011 berš so sine realizirime anglutni kerdi anketa e Agenciake.
I Agencia tari EU bašo fundavno niamia potencirinen kaj isi panda baro čorolipa e Romenge an i Bugaria, Čehia, Grcia, Špania, Hrvatska, Ungaria, Portugalia, Romania thaj Slovakia.
