An o 16 mart o Ministeriumi baši javno administracia thaj informativno sasoitnipa prezentiringja raporto informacie taro Registari e bukjarnenge an o sasto sektori bašo 2016 berš.
Aso olende an i them isi 12.921 institucie thaj 129.653 administrativcii.
An i grafa Roma tergjol numero 1.215 Roma. An o procentia sikavdo odova legarela 0.93%!
Thaj akana so šaj te anel pe konkluzia? Savore džanaja ki godi kote bičhaven pe sine sar sukcesu sa o romano politikano bloko thaj partie soske savore “mudargje pe” te čhiven an i buti e Romen ki javno administracia. Odova vakeren le phravde mueja!
Alo manušalen, ko kaste akate “kerel buti”? Falibaske si li o 0,93%? O Ramkovno dokumento vakerel aver informacia. Aso statistikane informacie taro 2002 berš o Roma ko nacionalno nivelo si 2.62%. Te sine sar sikavdo parametri an i javno administracia “nane” panda paše 2.100 Roma – administrativcia!
Si le e Romane politikane partien kalkulatori te keren lačhi esapin? A panda majteleperavde si dali čače o Roma si akana 2.6% taro sa o nacionalitetia so isi an i Makedonia ko akava momenti? Te čhivgjem odova da an o gono tegani ka ikljok kote siem jekh BARI “nula”,an o sasto procento!
A namangava mo muj te phravav okole Romenge so si an i javno administracia , kobor si o numero naRoma so “khuvgje” ko odola thana!
