An i mahala Lozovik, Velika Plana, arakhle si mule šudarde thaj mule i Angelina Tufegić (80), thaj olakoro čhavo Živorad (51) , so dživdinen sine an o čorolipa thaj pandž berš bizi elektrika thaj love. Ola mule taro šudro thaj bokh!
O trupia arakhlja olen olengoro džamutro o Sreten Milojević. “Kana resljum ko kher sine karanluko. Kana dikhljum akahargjum policia.
Agorutno drom dikhlem amen angleder o nevo berš ko dekemvri. Šaj si mule deš divesa! Amen e romnjaja dživdinaja phare thaj bilovengoro thaj našti sine te da olen suporto. Ola na len socialno soske i muli Angelina ko olakoro anava sine la 60 aria placi, a persi mart dengje la jekh drom arka taro 50 eura thaj jekh šporeti an o kašta.
Akava so ulo čače si bari bibaht. O čahvo o Živorad sebepi čorolipa nikana na prandingja pe thaj sine pe dajaja. E Angelina sine la čhaj i Mirjana so sine an o parunibe pe dajake thaj phraleske, barabutne pe romea o Dobruca Simić.
