Angleder jekh berš tekvaš savore zapendžargje pe e aktea taro 31 berš velešanco, kote sebepi so čorgja 150 kebapia thaj nesave aver artiklia, sine krisime trin berša phanlipa. O barabutno zijani so o velešanco kergja le e kafanake so čorgja si 6.000 denaria jali 100 eura. Odova sikavela kaj bašo zijani taro 100 eura o velešanco sin krisime trin berš phanlipa.
O droma si telal pani, iv. O čorolipa si ko sako than. Legaren pe kriseskere procesia an i Makedonia lende proviziemge taro političaria taro legaripa thaj i opozicia. Lejbaske mito, procentia taro tenderia thaj aver. Si procesoa, numa bizo efekti. O bare mačhe si naastarde. Mito, afere, provizie, garaviba danoko thaj aver. Milionia eura si čorde thaj but dživdipa invalidizirime, ma apalem ola si ko tromalipa, bizo phanlipa.
Sa akava si lačhi lekcia e velešancoske. Kana kere kriminalo ma te dža ko hurdo -tikno kriminalo. Ma čor 10 kebapia. Ma ker čoriba taro 100 eura. Soske an i akaja them ko phanlipa šaj te dža. Te šaj ma te dža ko phanlipa , ker milionsko zijani thaj arak tuke učharin upral o šero. Thaj ma te bistren te den vika: “Nane jjursidkicia, nane tromalipa”. Tegani sa si lačhe.
