– Nae man thudeskem thaj mareske. Odoleske ka kera akava so si majpahre jekhe jerieske , numa majlačheste si agjaar, ko than te merel bokhatar thaj šudrestar – vakerela o Dragan Nikolin, o bibahtalo dat so sebepi o čorolipa mangel te del ple bebe so akava masek trubul te bijanel le oleskiri romni.
O Dragan Nikolin (45) thaj oleskiri nalegalno romni Žana Medža (32) dživdinen an i komuna Žitište, a n o than Itebej, sebepi bilačho finansisko situacia mangen te den pe bebe so panda nane biamo. I Žana si ko 9-to masek dovogjende thaj nane len šartia te bajraren e bebe. Olende isi len panda duj čhave , Dragan (4), thaj Dragana (5) so non stop vakerena kaj si bokhale thaj olemegere jerien nane len takati soske nane len love hajbaske. Ola ko majbaro šudro phirgje dži ko Beograd.
Bešaja ko pašiša tari jekh deponia, kotar so lelem jekh dušeko kote so sovaja. Dživdina bizi elektrika, pani thaj tato, thaj agjaar si 4 berša kana pelo amaro kher so arakhel pe sine trujal o kanali. O kher sine opurano thaj pelo tari vlaga.
