O Nazif Mujić so pe familiaja dživdinela an o lukavičko mahala Svatovac, bašo 4.000 eura bikingja i Silber mečka, phursako so reslja an o berlinsko festivali Berlinale baši šerutni muršani rolja an o filmi “Epizoda taro dživdipa e manušeske so kehdela purano metali”
O Mujić vakerela kaj an o akava akti kergja sebepi o nanipa.
„ Nane man sine so te dav e čhavenge ni sabaluko, ni ručko ni rakjate ahjabske. Na sine man khanči. Sa okola bukja so sine man thaj sine hari majšuže so angjum len tari Germania bikingjum olen” vakerel o Mujić kote angleder duj berša pe familiaja sine an i Germania sar azilanti numa palo desavo periodi alo peske ko Svatovac.
Ko kher kote so bešela si e romnjaja i Senada thaj o trin čhave , o duj čhija i Šemsa (10) i Sandra (8) thaj o pandž beršengoro Denis , so trujal so na sine amen hajbaske , na sine amen kašta odoleske an o internet čhivgjum odova kaj bikinaja i statuetka bašo 5.000 eura.
O interes sien baro thaj počmingje te roden manuša taro BiH thaj avrial.
„Dena sine duj, trin, štar mile eura, numa amen roda sine pandž. Numa jekh drom alo jekh manuš taro Srebrenik so na pendžarav le sine. Gelem olea thaj sikavgja amenge jekhe manupe so vakergja mange:” Bašo 5-10 berša i statuetka palem ka ovel ki tute khere” vakerel o Mujić thaj dophergja kaj odoleske dengje le 4.000 eura.
Odole lovencar kingja artiklia khereske pukjingja o smetke baši struja ma te čhinaven leske ko akala neberšeskere divesa thaj e čhavenge kingja trin paketia.
O Mujić peske vakerel kaj si bukjarno .
Ko nevo berš o Mujić khuvel bare optimizmea. O resto love ka kerel te kinel bileto so ka džal dži ko Berlin soske sar so vakerela si akahrdo an o festivali Berlinale. So ka kerel palo odova vakerel kaj o avutnipa na dikhel pe familijaja an i BiH.
