O manuša so dživdinen an o Podrimce ko pašipa taro Leskovac, vakerena kaj ko vakti taro randipa panjeskiri infrastruktura ko pašipa tari Pašaskiri češma angleder desave kurke bagerea randingje jekh kazani pherdo somnakaj, numa dži avdisutno dive odova somnakaj na dikhlja le ni jekh.
O bukjrane tari firma ” Telekomunikacie” taro Blace vakeren kaj ola na arakhel nisavo somnakaj, numa i paramis buvlili maškar o manuša taro Leskovac, thaj akana o manuša so rodena barvalipa iklile an o tereno thaj randena em rodena.
Dži kote o bukjarne demantirinen nesave manuša si šubikerde. Jekh olendar vakerela: ” Me sium sine an i niva kana ko 50 metria mandar dikhljum sar khedingja pe grupa manuša uzal o bukjarne. Me gndingjum kaj ola randle khanig numa so odova nadikhljum, thaj ko suno nane te pakjava sine kaj arakhle boksi somnakaea. Palo odova šungjum taro mire komšie kaj arakhle desave bukjarne 300 gilogramia somnakaj”
O kustoso an o Nacionalno muzei an o Leskovac , Julijana Pešič vakerel kaj ko 60-to berša nakhle vekoske ko pašupa taro Podrimci sine arakhlo bronzeno vast thaj 137 kotora silber monete.
“Hari si pakjavutne kaj si arkahli odokhar baro numero somnakaj numa ko dujto thaj trinto veko an i nevi era sine Rimsko kvartia ko odova than”.
I somnakaeskiri histeria tinanena an o Leskovac. Aso o legende o Truklie kana našena sine tari Srbia parunen sine o somnakaj ko akala thana, mangipaja te iranen pe desavo drom thaj te len peske palal odova somnakaj. Dži akana an i Srbia majmoldime so sine arakhle sine šel kilogramia somnakaeskere neve rimsko momnete so sine sar plata bašo legionaria. thaj somnakaeskere šlemia baši parada. Olengoro moldipa barabutne sine paše 1.5 milionia eura.
Aso o kanonia an i Srbia sa okova so ka arakhel pe trubul te notirina le thaj odova ačhola e themake. Okova so arakhela odova barvalipa šaj te den len phursako, procento so i korkoro institucia notirinela olakoro učipa.
