An o 5-to Noemvri 2016 berš o 30 beršengoro etnikano Bugari Ivan Nikolov čhurikaja posavgja thaj mudargja e Rome Asen thaj e Romnja Vasilka Ilievi ko olengoro kher ki diz Pazardžik, Bugaria.
Ov sine mukhlo tari policia o aver dive soske ov agjaar rodingja. Ov anglal o Krsio notiringja kaj mudargja e Romen soske sine inspiririme tari jekh patriotsko gili. Palo odova gelo ko kher tari i familia Ilievi kaste angleder pendžarel len sine thaj sine premal oleskere lafia šukar manuša , thaj brutalno mudargja olen čhurikaja. Ola sine phure manuša thaj našti sine te maren pe olea jali te našen. Palo o mudaripa o Nikolov gelo peske khere. Ov udžarel sine i policia te avel thaj te astarel le. Ov pakajala kaj kergja baro historikano akti thaj ka ovel nacionalno heroi jali aver forma mediumsko čeren.
Ov sine but mazumi kana niko na avilo pali oleste. Javinate palem irangja pe ko than kote kergja o mudairpa lelja i puška thaj počmingja te phajrarel prema o Roma so sine ko drom. Kana i policia reslja , o Nikolov del sine vika kaj si ov o manuš so mudargja e Rome thaj e Romnja em mangela te mudarel sa e Romen , ama ola napakjana le sine.
Ov tegani panda pobuter holjangja. Ov anglal o kriso ko 08.11.2016 beršvakergja kaj si došalo thaj na hošinel nisavo bangipa, thaj vakerela sine kaj šaj palem te mudarel nekaste thaj te kerel palem asavko akti. O Krisangja decizia te bičhaven le ki Psihiatrisko klinika ko phanlipa ki diz Loveč.
O Nikolov angleder da sine krisime bašo kriminalia thaj sine narkomani, numa kana mudargja e phuren, na čorgja khanči taro olengoro kher. Ov vakergja kaj oleskere motivia sine salde rasistikane.. Numa aso o Kriso notirinel kaj oleste šaj si le desavo psihičko nasvalipa thaj problemia odolea so o šefi e policiake an o Pazardžik vakergja anglal o mediumia kaj o mudaripa nane nisavo taro rasistikane jali etnikane motivia.
Te vakergjan o čačipa kote mudarea Romen soske na kamea Romen odova si but naprifatlivo an i Bugaria trujal so beršencar si an i integracia , inkluzia thaj manušikane hakoa. Javer vakerin si kote o fakti so čajljarel e legarutnipa si sar egzamplo, ov si dilo thaj odoleske kergja odova. Odova nane jekhto akti so si kerdo an i Bugaria thaj i reakcia taro avrial tari them ka kerel li o legaripa te dekalririnen e manušen so mudarena sar dile thaj te ikaven le taro džovaplipa.
Odova ka kerel le definitivno sar baro heroi anglal o jakha taro terne “Patriotia” an i Bugaria.
Odova si ko jekh sar o Angel Kalev so margja e tikne Mitko taro Ovčepolci numa sine mukhlo sar šartiale globaja.
Paše 100 Roma organiziringje protesti aknglal o Kriso ko Pazardžik ko 08.11.2016 kana rodingje akti thaj sine but razočarime tari andi decizia taro Krisi so angja decizia e Nikovo te bičhavel ole an i Psihiatrisko klinika.
I Romani jekhin si šokirimi thaj šaj si akana vakti te kerel pe khanči anglal te oven panda asavke mudaripa. Savore amen dikhaja o thema sar so si Bugaria, Ungaria, Čehia thaj Slovakia si inficirime taro Anticiganizmo thaj i Romofobia.
Savore dikhaja kaj i Europa si pherdi Fašizmoa thaj disintegracia an i Europa ka ovel ko sig vakti. Amen na trubul te ova pasivno opservatoria amare istoriake so pohari palem ovela. Trubul te lel pe akana sig akcia!
