I Kanada ko agor e avutne beršeske la čhinavel o vize e dizutnenge so aven tari Romania thaj Bugaria, numa angleder ka tiknjarel o limitirba, avkergja erati e kanadiakoro govermento. Akala duj thema čhivgje o bivizakoro režimi sar konkludno šarti te del pe suporto ko Sasto ekonomikano thaj biznis kontrakto (CETA) kote i Kanada thaj o EU parafiringje akava kurko.
Pali odova i Romania thaj i Bugaria angleder jekh kurko resle kontrakto an i Otava te čhinaven pe p vize, so ka oven validno taro 1 dekemvri 2017 berš kana o duj thema zojrakergje o daravina kaj ka blokirinen o kontrakto vash tromalo biznisi.
„O čhinavipa e vizenge e Romaniaja thaj Bugariaja sikavel kaj šaj te dromarel pe ki Kanada bizo vize e dizutnenge so si membria an i EU. Savoren ka ovel sukceso taro tromalo dromaripa thaj biznisi” vakergje prekal vaktavin o ministeri vash emigracia o Džon Mekalum.
Sa dži kote saste na čhinavel pe saste o vizno režimi, e kanadiakoro govermento vakergja kaj sa o romansko thaj bugarsko dizutne so ko agorutne 10 berša resle kanadsko viza vash limitirmo thanjaripa, jali so isi len validno amerikansko nathanjaribaskiri viza , ka oven ikavde taro akava režimi.
