Si li o šamarke mukhli metoda kana bijanel pe ki themakiri klinika?
I diskriminacia upral o Romane džuvlja si panda praksa, vakeren tari Iniciativa e džuvlengiri taro Šuto orizari kote sikavena i vakerin tari S.A.
Ake integralno o sasto vakeriba akale romnjakoro:
„Bijangjum angleder jekh kurko. Kana aljum dži ko 10 masek bijanipaskoro periodi thaj nakhavde terminea bašo bijanipa, mlo matično ginekologo dengja man lil te džav an i Klinika baši Ginekologia thaj akušerstvo (GAK) thaj lipargja mange “operacia – carski rez” sar jekh taro variante bijanibaske.
Geljum ko hospitali, thaj thanjakergje man ko “patološko” odeli. Pali kerdi kontrola thaj CTG, i rakj nakhljum tromale an o hospitali. Javinate o doktori dengja man vaginaletka te šaj startujnel o bianipa. Palo ručko astargje man pohari o dukha, numa kana o doktoria kergje mange palem kontrola vakergje kaj isi panda vakti bijanipaske.
Rakjate ali aver doktorka thaj vakergja e akušerkake:” I romni trubul avdive te bianel- čhiven lake panda jekh vaginaletka”. Palo odova irangja pe mange thaj vakergja mange” O bebe si irame an i horizontala, ka udžara te iranel pe natele, te na ka bijane prekal carsko rezi”. Ali jekh akušerka, čhivgja mange i dujto vaginaletka thaj dengja man jekh dokumenti te čhivav parafi – potpis. Numa te avkerav kote me sium analfabeti, thaj ko odova momenti na dikhljum ko savo dokumenti čhivgjum mo aparafi. Ni jekh na vakergja mange savo si odova dokumenti, thaj soske me čhivav mlo parafi ko odova dokumenti. Palo desave saatia počmingja te thavdel rat palem kergje mange kontrola thaj vakergje kaj o bebe si ki lačhi pozicia thaj te ukljav ki hala bijanibaske.
Trujal so dži tegani sa sine šukare, taro jekh drom reslje ma bare dukham, so našti sine te ikerav len. O dukha sine but bare thaj dukhavne , thaj ki hala bijanibaske počmingjum te dav bari vika. O akušerke so sine ki odoja smena vakergje mange: ” Ajde bre tu pandžto drom bijanea na de vika odokhare”, Me vakjergjum lenge kaj si man bare dukha thaj akhargje e doktore. O doktori ukljargja man ko boksi thaj kergja kontrola. Mande sine man but dukha thaj dav sine bari vika. Šungjum kana o doktori vakergja e akušerkake: “Den la Amizol inekcija te šaj nakhen o dukha”. I akušerka posavgja man inekcijaja thaj vakergja mange: ” Ajde kana deja odokhar bari vika , huli akana korkoro taro boksi thaj aj dža odori shide tut!” Me pučljum la: ” Savi si akaja inekcija?” Oj vakergja mange: “Spazmeks, nane khanči ka nakhen tuke o dukha te na de bari vika”.
Phareste huliljum taro boksi, numa kana dikhljum tele sine but rata.
Palo disave saatia bare dukha palem ukjljargje man ko boksi , alo o doktori kaj akana ka bijanav thaj gelo peske. Ačhiljum duj akušerkencar jali aver , nadžanav ni me so sine odola?
Jekh olendar vakergja: ” Ajde tu dži akana pandž droma bijanea, tu džane korkoro te bijane da”. Em geli peske.
I dujto akušerka isto mukhlja man thaj vakergja: ajde bijan tuke korkoro, mange agorkergja mlo bukjarno termini, ka mukhav tut korkori. Tu dži akana bijangja 4 čhave, odoelske ma ker tut but odokhare thaj ma de vika!” Em geli peske.
Sar pilja pi kafa em i cigara i jekhto akušerka (dikhljum la prekal o džami karši) ali thaj vakergja mange: ” So deja vika odokhare ma, sar na ladžaja, sar džane sine te kere 5 čhave, tumende e romen salde odova džanena!. Tumen o Roma džanen korkoro te bijanen tumenge”.
Ali thaj i dujto akušerka thaj o bijanipa startujngja, a mande pobut na sine man takati thaj tari inekcia sium sine omalakajmi. Saste vakti o duj akušerke dena sine vuka upral mande soske anglutne dengjum but vika taro dukha, thaj ko jekh momenti khuvgja man šamarka. “Soske khuveja man?” pučljum la, a oj irangja mange panda jekh šamarka em i dujto akušerka vakergja: ” Soske deja vika sar jekh gurumni”
Ko odova momenti khuvgja majpakjavutne hospitalizeri , zorale bastringje man ko vogji thaj o bebe iklilo. E bebe ko jekh momenti na sine le hari lufti, numa ali jekh doktorka, thaj legargja ole bizo te dikhav ole. Palo desave saatia irangje man ki soba, numa saste vakti dikhena man sine thaj dena sine komentaria so dav sine vikathaj na trubul agjaar romnajke so bijanela pandžto drom. Pučljum e akušerken sar tano o bebe. Ola vakergje: ” Šukar si, isi le hari hepatit thaj akana si ko aparatia” Ko hospitali ačhiljum 5 divesa thaj saste vakti ni jekh drom na mukhle me familia te šaj dikhav olen. Našti panda te havav so ulo mancar taro khuvde šamarke thaj kerdi diskriminacia thaj o nahumano akti kerdo upral mande an o GAK. Akana pučava akava mancar so ulo si soske sium “romani” jali sakonea keren agjaar?
Trubul li e Romane džuvljen te bijankeren pe šamarkencar???!!!, tergjol ki vakerin so prezentiringje i Inicijativa e džuvlengiri taro Šuto Orizari.
Link: http://www.ringeraja.mk/statija/eve-shto-znachi-da-si-romka-i-da-se-poroduvash_5265.html
