O Roma tari niško mahala Crvena Zvezda blokiringje o drom “Dušan Popovič” soske nane len elektrikani energia pobuter taro 45 divesa sar so vakerena akava drom ka ovel blokirime sa dži kote palem na mukhen olenge elektrikani energia.
Ki akaja mahala isi paše 100 familie kote sako familia gejnela po 5 džene thaj sa si Roma. O problemi e elektrikane energiaja si pruano nekobor berša napalal numa nisar te arakhel pe desavi decizia e problemeske.
Tari niško Eleketrodistribucia vakerena kaj nane ola notirime te čhinaven i električno energia thaj aso agorutne informacie o Roma tari akaja mahala si borčlie paše 240 milja eura.
O Roma vakerena kote ko 2014 berš phanle kontrakto te pukjinen paišalno i elektrikani energia soske salde ko 17 khera sine čhivde apartia so gejnen kobor hardžinel pe elektrikani energia. Sa rso vakerena dži akana ola pikjinen sine paišali ko učipa taro 900 eura ko masek a taro 22 avgusto si čhinavdi olenge i elektrikani energia.
Ola vakerena kote akana o vakti kana si hari majšudro nadžanen sar ka keren bizi elektrika. Phareste si sar diveske agjaar rakjate, a majphareste si okolen so isi tikne čhave.
Sar ka arakhel pe decizia akale problemeske ka dikhel pe akala divesa, soske sako institucia frdel plo džovaplipa avereske.
