An i Germania na bajrol salde i ekonomia numa thaj o čhavorikano čorolipa, kotar so ikljola tari majnevi studia akale problemeske. Došalipa akaleske legarela thaj i felerično familiarno politika. So trubul bašo lačho thaj bahtalo čhavoripa?. Diferenciaja taro aver thema an i lumia, an i Germania bahtake trubul okova so si majiportantno an o dživdipa. Hajbe, kher, jevendaskere šea, medikamentia, bilovengiri edukacia – si funde so trubula te oven.
Lorolo čhavo tari Bavaria jali Berlin dživdinel ko majbare privilegia ki paralela čorole čhavea taro Bangladeš jali Burkina Faso. Numa thaj ki germania bajrol o numero čorole čhave. Odova ikljol tari aktuelno situacia thaj studia havljardi tari fiondacia Bertelsman. Odova si: paše duj milionia čhave an i Germania avdive dživdinen ko familie so len socialno suporto, so si pobuter numa kerdi paralela ko periodo angleder pandž berša. Baši čorole esapinen pe o čhave kaskere jeria si bizi buti thaj odoleske len lovengoro suporto tari them jali aver anavkerdo sar Harc4. O informacie datirinena tari statistika e Nacionalno agenciake baši buti thaj lungoberšengiri studia bašo konsekvence taro čorolipa ko čhave thaj tinejdžeria.
