Persi berš an o Rim an o 20 avgusto ko vakti tari limoriengoro ceremonialo uptal 60 beršengoro Vitorio Casamonice anglal i khangiri San Giovano Bosco ko vakti taro religiakoro akti bašavel sine i muzika taro filmi “Kum”
Numa o klano Casamonice nane le nisavi konekcia e Siciliaja thaj siciliansko mafiaja. Ola si Roma taro regiono Abruzzio tari Pescara thaj avile an o Rim ko 70-to berša thaj kergje unia e kriminalconcar tari teganutni rimsko mafia anavkerdi sar Banda della Magliana.
Palo odova o klani Casamonice lelja o bizniso ko šverc drogaja, reketi thaj prostitucia ko jekh kotor taro Rim.
Avdive akava klani si le milja membria.
An o 2013 berš ki policiakiri akcia lendo si lendar 23 vile – apartmania bazentencar, deš vordona marka rolls roys thaj ferrari thaj jekh privat hipodrom.
Lendo si thaj 5 milionia eura thaj aso o informacie tari policia sasto imoto taro kalno Casamonice si moldime upreder 100 milionia uera so si hulavde ko 45 familie so kontrolirinen o Rim.
E parunibaskiri ceremonia sine an o Holwood stili kote an i kolona sine upreder 250 vordona.
Ko disave kriseskere procesoa mujal akava klani pele but političaria soske konektirime ola akale klanea.
Ko jekh raporto vakerel pe kote paše familia taro akana mulo Vitorio reslja sar “phursako” ko masek 20.000 eura te ikerel e klane tromale ko vakti taro desave politikane kampanje thaj aktivitetia.
Jekh membro taro akava klani sar so si o Massimo Carminati gelo an i politika sar membro an i neofašistikani partia MSI a palo odova gelo ki partia NAR. Ov ko jekh konflikto thaj daravin čhurikaja thaj 34 posavinaja mudargja e Giovanni Gargani. Odova ulo ko 1980 berš kana sine krisime 20 berš phanlipa, numa ko 1986 berš sine mukhlo ko limitirimo tromalipa, a ko 1994 berš sine saste mukhlo dekretea taro teganutno presidento o Scalfaro.
