O vice šefi tari EU delegacia an i Srbia o Oskar Benedik erati vakergja kote sare so rodena azili so si tari Srbia ka oven irame taro EU thema, soske nane len nisave šanse te resen azili an i thema so si an i Unia.
“Okola so aven tari Srbia, o šanse te ačhon an o thema tari EU si praktično nula. Ola ki sako forma ka oven irame an i Srbia. Pučibe si ki savi forma ka ikljol i Srbia te arakhel decizia e manušenge so iranena pe te šaj kerel lenge majšukar šartia dživdipaske” vakergja o Benedik anglal o žurnalistia ko khidipa anvkerdo sar “Beogradsko dialiogia”. Aso oleskere lafia i EU si koncentririme e problemea taro migrantia so aven taro thema kote si mariba, a dujto aspekti si o azilantia sar so si tari Srbia. I EU dela suporto e Srbiake te faisalkerel o problemi r migrantencar sar stručno agjaar thaj finansisko. “I EU dži akana hulavgja 11,5 milionia eura ,a ko periodo so avela ka hulavel panda 20 milionia eura an i konekcia akale problemea” vakergja o Benedik.
