O Roma taro trin mahale an o Leskovac kote isi paše 7.000 Roma o mule ko Svetilijakere limoria parunena pe jekh upral aver, thaj buteder droma o tikne droma kote so nakhen pe taro limor ko limor.
Kerel pe lafi ko startu taro kotor e limorenge so trujal o drom legarela ko Jajina kotor kote parunen o aver dizutne taro leskovac.
-Ko agorutno vakti o mule parunena pe upral o trupia taro ple paše familie soske nane parcele thaj than dži kote aver keren limoriengere neve parcele ko tikne droma so hulaven pe taro jekh ko javer limor” notirinela o Zoran Saitović membro ki romani organizacia “Rosa”
E dizjakoro šerutno Leskovac o Goran Cvetanović alcentiringja kote o limoria ka buvljaren pe thaj ka den pe love neve thaneske so si ki lokacia Špatilj kote parunen pe o Srblie.
Akava si nadefinirimo džovapi numa konkretno na e romane problemeske, akcentirinela o Saitović.
Ko JP “Komunalec” so kerel buti thaj ko limoria vakerena kote o purane romane limoria nane kotor tari opservacia thaj o Roma korkoro keren peske o thana – akcentiringja o direktori akale firmake o Dragan Milenković.
Telel o Jajansko drom angleder biš berša formiringje pe neve nalegalno limoria so isi asavke da limorenge thana so manuša uzirpirinen baro kotor. Isi asavke limoria so si po 50m2 a odothe parumo si salde jekh mulo.
