Ko 1-to oktomvri persi berš ko 69 beršengoro phuripa palo pharo nasvalipa muli jekh taro majpendžarde romane giljavutne anava taro akala thana i Usnija Redžepova. Ki olakiri biografia tergjola kaj si biami an o Skopje ki čoroli familia thaj 6 lhavencar. Ko ple dende intervjuia dende anglutne akcentirinel sine kote nadžanel ni korkoro sar šaj tari jekh ladžavutni čhaj uli giljavutni. Oj avkerel kaj olakiri daj sine Khorani a doat Rom – džambazi so kerel sine buti grastencar.
Olakoro dat na sine le čhave e avgo romnjaja thaj mukhlja pe olaja thaj lelja e dijaja tari Usnija so anglutne sine la duj čhave. Palo odova biandile panda 4 čhave maškar olende thaj i Usnija. Olakiri daj sine but disciplinirimi džuvli, numa olakoro dat sine but lošalo manuš.
– Mo dat sine boemi. Uravel pe sine but lačhe. Dava man godi kote čhivel amen sine te khela em giljava, numa me sium sine sako drom an i rig thaj ladžava sine. Numa ko jekh momenti ki mande phagilo jekh ladž thaj počmingjum te giljavav. Kana giljavav nane man ladž.
Mo dat na holjangja so uljum giljavutni. Ov del man sine thaj motivi. Jekh drom reagiringja ko vakti kana snimingjum o filmi “Derviš i smrt” kote sium sine uravdi ki jekh majca nage vogjea, numa vakergjum kaj odoja si i rolja thaj na buteder aver.
Oj notirinela kote ni jekh drom o,lakoro dat na margja la, numa jekh drom khuvgja la čhamidin, soske ov mislingja kaj hovavgja le, numa palo odova dikhlja kote i Usnija na hovavgja ole.
