Pobuter taro duj decenie i romani mahala ko Slavonski Brod kerena zori te faislakeren o problemi so nane len infrastruktura, thaj akana kana o roko baši legalizacia si ko agor, akate panda o bukja tergjona ko jekh than.
Ola udžarena i phuv so si telel themakere ingerencie te ovel dendi e Romenge te šaj majodorig te keren o akti tari legalizacia.
I bilovengiri legalizacia legarel pe sa okole objektenge so si len perimetar dži ko 200 m2 , a sa okova so si majbaro taro akava perimetar ka trubul sako familie te dopukjinel pestar korkoro. Ko starti i parcelizacia thaj hramosariba an o katastari ka trubul te ovel notirime direktno ko anava taro Roma so isi len odova than dživdipaske a si purane 30 berša. An i romani mahala asavke objektia isi upreder 250 khera kote dživdinena upreder 1000 Roma.
