O trupo tari muli džuvli duj divesa si trujal i phurt paše Skopsko saemi , thaj ni jekh themakoro ofiso na mangel te legarel le. I familia arakhle e 35 beršengere Vesta Stanković sar muli erati ko 6 o časo javinate, havljarel i NovaTV.
O trupo tari kašuki romni si ki faza taro kjirnovipa kote si anglal improvizirimo apartmano thaj akana o tato vakti kerel panda majbut te khandel. Duraldan si but bilačhi rea, a o khandoa počminen te han olakoro trupo.
Odva sa si telal i phurt taro MRTV so legarela premal o kvarti Aerodrom, ko frekfentno than kotar nakhena manuša thaj vordona. Olakiri sasuj i Sevdia vakerel kote havljargja ko sa o riga numa ni jekh na avilo dži akana. Ola našti te parunen ola soske si srpsko themutni , a o makedonsko pasporto si ki faza taro keriba.
„Sine nasvali , sate šuvli, piel sine alkohol. Arakhel la muli erati javinate. Niko na kamel te avel. Okola taro AD Butel firma parunibaske na lamen te aven olen interesirinela salde love. O socialno ofiso na avena. O vakti si tato o trupo si avrial telal i phurt thaj kirnjola, thaj akatar nakhena manuša thaj na džanena so si i buti.
Miri poti dikhela pe daja thaj rovela” Vakerel olakiri sasuj i Sevdija Memedovska.
Kana ali i ekipa taro TV NOVA ko than ko improvizirimo kher sovel sine olakiri trin beršengiri čhaj so ko jekh oj da si kašuki.
O mangina tari NGO “Ambrela” na kergja te anel e Centro bašo socialno bukja , taro Ministeriumi baši sociala, MAB thaj i firma AD Butel parunibaske. te šaj chiden o trupo thaj te parunen e terne romnja.
„Me sium saste vakti akate e familiaja. Rodav sa o riga, den man lafi taro socialno ofiso kaj ka aven numa akan si agor e bukjarne vakteske thaj ola panda na avile. Ko MAB vakerna kote našti reagirinena soske nane zorea meriba . O trupo si anglal o jakha tari olakiri 3 beršengiri čhaj , kirnjola. thaj aven o khandoja te han la numa i sasuj paldela len” vakerl baši TV NOVA i Ljatife Šikovska tari NGO Ambrela.
I familia Memedovski pobuter taro 35 berša dživdinen ano Skopje numa si bizo kher. Telal i phurt ko improvizirimo kher kergje toaleti si jekh berš.
Ola khedena plastično ambalaža te šaj te ovel olen hajbaske. Den apleo džiu ko ofisia te aven majsig palo mulo trupo, soske 35 saatia palo olakoro meripa isi šansa bašo inficirime nasvalipa. Premal agorutne informacie ko thavdipa si leiba o mulo trupo tari rig e AD Butel.
Link: https://www.youtube.com/watch?v=7KgfEvZNUDs
