O Roma tari mahala Rudina ko Vranje si bahtale ple komšiaja o 53 beršengoro Nikola Račipović, jali maškar olende majpendžardo sar Kole – stilisti.
Ola vakerena kaj o Kole si majšukar stilisti an i lumia. Ov maškar o Roma si le reputacia sar majšukar, stilisti, frizeri thaj šnajderi an i Gorna Čaršia.
Sar so vakerel taro sako drom leste interesirinel le sine o bukja so si konektirime e džuvljane šužipaja.
Nane romano biav, matura, parti jali aver a te nakhel bizo Kole. Sar terno sikavgja interes bašo te sivel džuvljani garderoba thaj modelia. Jekh drom oleskoro dat kana dikhlja le ki mašina sijbaske, lelja i mašina thaj saste phaglja ole. O dat leskoro dikhel sine ko odola bukja kaj oleskoro interes bašo džuvljano kreatori si but ladžavni buti muršeske.
Numa palo desavo vakti oleskoro dat pomukhlja thaj kingja leske nevi mašina sijbaske modelia thaj garderoba. I mangin premal o šminkiba thaj frizire ko jekh barile ko vakti kana sivela sine.
Inspiracia sine leske o indisko filmia so sine but popularno ko oleskoro vakti ko ternipa. Prekal o terko taro odola indisko filmia thaj o artiskte so khelen sine ko odola filmia ov šminkinel sine šple klientken.
Palo odova ov maškar o Roma reslja i reputacia sar majšukar šnajderi thaj stilisti thaj akharen le sine ko biava sar odothe agjaar thaj an i Europa. Bašo kompletno tretmani frizura thaj šminka sar so vakerel trubul le 30 minutia.
„Dži akana ko mle 30 berša buti ni jekh džuvli na vakergja kaj na kergjum la šukare. A kaj šaj te vakeren kana me totalno tranformirinava lengoro liko šminkaja so ola da našti korkoro prepenđaren pe ” – vakerel o Kole – stilisti.
O Kole si prandime isi le 2 lhave thaj unukia. Ov vakerela kote akale profesiaja parvarela saste familia a o unukia si oleske majbari loš.
