Ko 9 juni agorkerena 8 berša sar gelo o legendarno thagar e romane muzikake Šaban Bajramović. Mulo ko niško hospitali taro infarkt. O Šaban Bajramović si biame ko 16 aprilo 1936 berš an o Niš. Ki pli barvali muzičko kariera ikavgja 20 albumia thaj 50 singlia, hramosargja thaj komponiringja upreder 700 gilja. Sine an i prandin e Milicaja, kasaja isi le trin čhija. I Milici korkoro vakerela kaj si but phraeste te dživdinel bizo Šabani. Sar lipar ačhile lake oleskere gilja so šunela len sako dive thaj rovela.
Oj vakerela kote džvdinel penzijaja taro 9.000 dinaria (75 eura) , thaj te na oven olakere čhave oj ka merel bokhatar. Vakerela kote but phareste nakhavel o divesa bizo Šaban Bajramović.
„Giljavol sine ilestar thaj mangel sine odova. Nikana o love na sine leske ko jekhto than”, vakerel i Milica.
Ola ki olengiri prandin sine len 3 čhija, so savore si ko stranstvo. Ko jekh isi olen 11 unukia. Numa oleskoro talenti ni jekh nane ole.
„Oleskoro muzikakoro talento ni jekh taro oleskere na gelo majodorig. Odova talenti gelo olea ko odova dujto meribaskiri lumia. Isi amen 3 čhija thaj 11 unukia, numa oleskoro krlo ni jekhe nane ole. Ov odova talento na dikhela le sine sar ekstra, sine but normalno manuš. Ov na barvalilo tari pli popularnost. giljavel sine ko koncertia thaj ko biava salde te šaj te dživdina. ” – vakerel u udovica taro akava baro muzičari.
