Nacionalno natolerancia jali mafiaško akti? Trin divesa an o Radnevo i romani mahala si telal policiakiri opservacia. Ki romano mahala kote isi paše 800 Roma si evakuirime thaj ačhile salde 60 džene, majbut murša . O than si telel policiakiri blokada.
Sa akava ulo angleder desave divesa kana sine fizičko atako maškar duj grupe Roma thaj Bugaria (majpakjavutne kriminalno grupe). I policia reagiringja kote sine astarde o manuša so margje pe (štar Roma) thaj sine legarde anglal o kriso thaj ikerde ko phanlipa. Palo odova o aver dizutne bugaria počmingje te keren protestia mujal o Roma tari mahala thaj kamen sine te keren linči.
Olencar ale thaj Ultrasia (neonacistia) so dengje nevo momenti akale anti Romane protesteske. Ko sa akava sar benzini ki jag čhivgja thaj o lokalno legaripa kamel te peravel saste mahala, sebepi sar so vakerena si sa nalegalno apartmania. O lokalno legaripa si indirektno telal o ingerencie taro Centralno leagripa taro premieri Bojko Borisov kote odolea sikavena plo antiromano natolerancia tari akaja them kote ko agorutno periodi but Roma si targeti ko atakia upral olende an i Bugaria.
Si li akava nevo starti tari nesavi nevi bugariakiri politika mujal i majmarginalizirimi minjoriteti an i lumia ka sikavel o vreme. Akan trubun akcie thaj reacie tari rig e EU thaj o institucie kaskiri si i Bugaria sar membro.
Link: https://www.youtube.com/watch?v=ycnKHwTBqgo
