Dive e Romengoro – 8 April , mange si o efekto sar “Dive e kašteske” an i Makedonia. Sako berš sadinen pe milja kašta thaj den pe milja eura, numa o efekti si palem katastrofa, thaj naproduktivno. Agjaar si o notiriba e Romane diveseske an i Makedonia. Odoleske so e Romenge na trubul jekh dive sama taro o dizutne sar so trubul ma te ovel salde jekh dive an o berš, kosem si sadingjan kašt te ovel friško lufta – havaja dišibaske.
Angleder desavo vakti šungjum kaj sium romano napatrioti thaj sar žutnalistu. hramosarav sasto vakti mujal o Roma !?
Oja hramosarav sine mujal o Romane političaria thaj olengere nalačhe kerde politike okola so trubul te keren šukaripa e Romenge, a na kerena..
Numa ni jekh drom na hramosargjum bilačhe e manušeske so khedel taro kontejneria te šaj parvarel ple familia. Na hramosargjum bilačhe ni e mamiake so nane la love te džal ko ginekološko kontrola soske nane ginekologia an i Šutka. Na hramosargjum bilačhe e manušeske, so čhinavgje lestar o socialno soske resle leske love taro “Western Union” te šaj kurtalinel pe romnja so merel sine taro karcinomi Oja, hramosargjum thaj e manušnjake so dživdinel an o droma thaj si la gangrena an o pro, a o hospitali na manglja te sasljarelčla soske na sine la sastipaskoro siguriteti thaj dokumentia. Valjani panda te genjav, save Romenge hramosarav sine “bilačhe”?
O Roma nane salde o romane političaria. Sa okola so isi len funkcie, trubul te haven kaj valjani te oven amala thaj te pien kafa e žurnalistencar, numa nesave žurnalistia, nane te trainen olengere politikenge.
Odoleske dži o sa romane lideria, te sine odokhare patriotia astaren keren buti, lačharen o dživdipa e romane jekhinake.
Savore avdive, o dive notirinena organizirinena, muzika..Avdive ka šuna mesažia kaj akala političaria so legaren i them ka keren majlačhe o Romano dživdipa, thaj te margje o VMRO – DPMNE palem o romano dživdipe ka ovel majlačhe.
A akala politike kergje o Roma te džan tari Makedonia . Avdive i Šutka si jekvaš čučo. O terne plo avutnipa roden prekal o aeroporti “Alesandar Veliki” tiketo ko jekh drumo. Avdive o terne Roma kana ka hramosaren fakulteti len o indeksi ko vast a ko jekh khuven an i desdavi politikani partia te šak plo bukjarnipa dikhen prekal partisko legitimacia a na e fakultetsko diplomaja.
Avdive me na kerav akava dive soske ni jekh našti vakerel o dive taro mlo nacionaklno identiteti!. Me sem Rom – 365 divesa an o berš, a na salde ko 8 Apeil!
Dehran Muratov – CIVIL
