Ko avipa e Lumakere diveske e Romengoro – 8 April , pobuter romane organizacie , khidipa thaj institucie te konektirinen pe ko notiriba akale diveseske kote ko akava 2016 berš si jubilei 45 berša taro Jekhto Kongresi taro IRU an o London, Bari Britania.
Ko pervazia taro IRU legarindo ple aktivitetia notiribaja akava dive. Odoleske akale diveseske o Prezidento e IRU-skoro Zoran Dimov prezentirinel pire akspektia e IRU-ske.
Roma Times: Rajo Dimov ko agorutno 10-to Kongresi taro IRU an o Skopje an o mart 2016 , tu sian sine alusardo sar nevo Prezidento taro IRU bašo akala 4 berša?. So si tumenge akaja funkcia?.
Zoran Dimov: I funkcia Prezidento an o IRU mange si baro respekto numa thaj panda pobari buti te kerav. Te oven ko učipa e majpurane thaj majbare Romane Lumiakere organizaciake so akava berš kerel jubileo 45 berša si baro motivi te kerel pe buti bare zorea, pharipa akale funkciake dela panda pobuter prekal andi decizia kote pli vota dengje upreder 70 delegatora upreder 35 thema tari sasti lumia.
RT.: Ko agor e Kongreseske taro IRU an o Skopje, angjen decizie, dekretia, rezolucie. So si majimportantno odothe?
ZR.: Ko akala duj divesengere aktivitetia taro IRU Kongresi, sine interesno thaj kvalitetno diskusie thaj teme, so si konektirime bašo romano pučibe. Odothe preperel o Romano aktiviteti, maripa mujal diskriminacia, segregacia, sa o pobaro rasizmo mujal o Roma, migranstko kriza, identiteti, thaj aver ratvarina sar so si o Holokausti thaj genocidi upral o Roma, thaj ko jekh adekvatno nivelo e Romenge thaj IRU an o sa internacionalno institucie.
RT.: Jekh interesno momenti ko Kongresi si inicijativa sar strategia thaj plani baši Demokrtasko tranzicia thaj elektronsko votiba ko vakti taro avutno 11-to Kongresi taro IRU so si planirime bašo 2020 berš?
ZR: Trubul te potencirinav kote o IRU si seriozno thaj bari organizacia. Oj funkcionirinel upral demokrtasko principia. Te šaj te sikaven pe akala principia sine analogno te kerel pe thaj jekh asavko plani sar so si i Demokratsko Tranzicia. Trubul te akcentirinel pe kaj kreatori akale ideake tari DT si o manuš so angleder 45 berša sine ko Jekhto Kongres taro IRU an o London so sine alusardo sar Generalno Sekretari a odova si o rajo Gratan Pukson tari Bari Britania. Odoleske o plani thaj i strategia , kote ov si thaj Prezidenti e Komisiake ki implementacia e Demokratsko Tranziciake. Ki odoja Komisia isi panda 9 membrora taro IRU thaj aver avrutne ekspertia so ka arkahen o modaliteto elektronsko votibaske kote prekal elektronsko votiba ka alusaren pe o avutne delegatia thaj funkcie an o IRU. Odolea ka ovel len panda majbuvleste mandato an o IRU. Džanaja kaj o procesi tari DT si pharo thaj komplicirime numa o intencie kote i Komisia baši DT si ko starti te kerel jekh baza taro 50 dži ko 100.000 potencialno romano elektorati so majodorig ka buvljarel pe.
RT.: So si aver prioritetia thaj aktivitetia taro o Prezidenteskoro ofiso thaj o membria taro IRU?
ZR: O plania thaj aktivitetia taro IRU si ko periodi so avela bare, thaj nane than ko desavo tikno formati te prezentirinela pe. Numa startujnaja aktivno te iranel pe o renome taro IRU so ko agorutne berša sine peljardo taro nalačho legaripa thaj menadžiriba. O purane lideria taro IRU pobut keren sine buti ple privatno thaj ple privatno biznis interesia, numa na ko anav e Romane populaciake thaj problemenge.
Amaro legaripa odole aspektestar te kera “Hiruško operacia” thaj o bilačhe elementia te kera eliminacia thaj si amen prioriteti te kera transparentno thaj phravde buti.
Me sar Prezidento thaj sa o aver membria an o IRU ko ple pozicie si prioritetia te irana o IRU ko pozicie kote trubul te oven a odola si UN, EU, EP, EK, CE, EVZ thaj aver institucie. I konekcia thaj buti keripa aver relevantno organizaciencar khidipa thaj aver. Kera plania ki buti thaj sektoria sar so si Romani integracia, maripa mujal rasizmo, diskriminacia, anti ciganizmo, segregacia, edukacia, kultura, tradicia, buti, biznis, socialno thaj jeriengoro jekhutnipa thaj aver elementia.
O zoralipa taro IRU dikhel pe tari parola so si amaro motivi bukjake a odova si Phralipe&Phenjpe+Jekhipa=Zoralipa.
Sa akava sikavel o čačune mangina taro IRU ko plo aktiviteti. O jekh a jekhipa sikava le prekal i struktura kote upreder taro 30% taro amare membria thaj funkcioneria si i Romani džuvli. Me sum hor pativutno kote akava Khidipa taro IRU ka anel nevo lačho momenti an o IRU thaj renesansa an i Romani nacia sakote an i lumia.
Te istemalkerav akava momenti sa e Romenge an i lumia, a siam upreder 40 milionia Roma te bahtarav o 8-to April – Romano lumiakoro dive thaj apelo dži ko sa o romane organizacie, aktivistia, politikane subjektia thaj aver akava dive te vazden plo hango bašo “Majlačho tajsa sa e Romenge”.
