O Švedsko govermenti bičhavel mesaži dži ko ple dizutne te na den love okolenge so mangen devlenge ko droma thaj e čhavenge , so trubul te aven an i škola, palo baro numero migrantia tari EU ko droma tari Švedska kote majbaro numero olendar si Roma tari Bugaria thaj Romania.
O Govermento notiringja nacionalno koordinatori te čhinavel o nivelo avipa taro čorole migrantia tari EU so avena but ko barvale skandinavsko thema. Premal i statistika persi anglo nilaj an i Švedska ale paše 3.400 dži ko 4.100 migrantia a odova si duplo pobaro numero taro okola so resle anglutne berša so sine taro 800 dži ko 2.000 manuša.
O numero šaj te ovel thaj majbaro soske isi problemia ko pobare komune kote našti te gejnen kobor migrantia ale olende.
Majbaro numero taro akala migrantia si Roma so aven tari Romania thaj Bugaria, a ko jekh isi thaj tari Čehia, Slovakia thaj Ungaria.
Ko majnevo rapaorto havljardo an i rig e nacionalno koordinatoreske Martin Valfridson vakerel kaj i Švedska na trubul te del love e manušenge so mangen devlenge thaj e čhavenge ko droma ola trubul te džan an i škola. Ko than te den love e manušenge ko droma, o dizutne tari Švedska neka den love te fondirinen pe organizacie.
