Ki diz Berane an o Montenegro, an i periferia e dizjake ko lokalno fudbalsko stadioni ko masek april persi berš ki bari jagakiri stihia, saste thabile duj khera taro duj phralja tari familia Bajram. Trujal akaja katastrofa, bahtake na sine manušikane viktimia, numa odoleske pobut taro 15 džene taro akala duj familie ačhile bizo khera. Akala khera sine nevekerde objektia, ko than kote i diz vakerel kaj si locirime an o nalegalno phuv.
Ko akava kotor tari diz Berane panda ko starti taro 1991 berš ale pobuter romane familie so ale taro Kosovo. Ola akate khergje peske nalegalno khera thaj saste uli sar nalegalno mahala.
So legarel pe dži ki organizacia nesave humanitarno akciake sar arka akale duj familienge, ake palo saste 10 masekoja tari akaja katastrofa , ni jekh organizacia jali institucia na sikavgja interes te kerel akcia te kerel pe sanacia tari bari jag. Sar so notirinel i familia Bajram ola taro ple love kergje improvizirime khera, te šaj an o majmizerno šartia te thavden ple dživdipaja thaj te pakjan kote o manuša so si len humano karakteri ka šaj te keren zori te keren ple nekanutne šuže khera sar so sine anglutne.
