Ki mahala kote nane ni kanalizacia, nane pani, pobut vakti nane ni elektrika trujal so si ko pašipa taro centari e dizjake Niš an i Srbia. O nacionalno konsilo e Romenge dengja vaktavin kaj akate o šartia dživdipaske si katastrofa.
Odothe dživdinen em čhave, em phure em nasvale. O čhave džana an i škola, numa ko karanluko hramosraen ple školsko savale. I phuri Katica Hasanovič notirinela: ” Isi man angina pektoris. Bašo 150 dinaria džava te užarav akhora sasto dive. Mo rom lela invalidsko penzia taro 10.000 dinaria. Odola love na resen ni mareske”
Ko but taro khera nane len bare električno apratia, soske nae len ni elektrika. Numa o problemi si o takjaripa, soske nane len love te kinen peske em kašta.
” But tano bilačhe. Nane elektrika, čika thaj panja ko sa o riga. Ladžavo tano akava so mukhen amen agjaar te dživdina” – notirinen o Roma tari akaja mahala.
Ki akaja mahala isi upreder 400 khera, kotar prekal elektrodistribucia, notirine kaj 50% taro akala khera nalegalno lena elektrika. Premal o lafia taro dizjakoro ofiso pobut taro khera si nalegalno kerde, thaj akana nane desavo definitivno statuti
