Erati ko 14 o saati si phanlo bašo trafiko o magistralno drumo Bitola – Resen. O dizutne tari mahala Bair tharibaja jag blokiringje o drumo sar revolti soske nekobor divesa si bizi elektrika. Akava nane avgo drom.
Po desavo drom ovel em po 10-15 divesa te ova bizi elektrika. O čhave khele ko droma, a oven trafikoskere bibahta, soske nane elektrika. Trubul te avel e dizjakoro šerutno te dikhel sar dživdinel pe bizi elektrika. Amen na trubul te pukjina i elektrika soske laja socialno. Mande si man thaj dekreto kaj na trubul te pukjinav elektrika. – notirinel o Šerafedin Musovski.
Akava nane nikote, sare šaj vakeren. Sebepi akaja elektrika o čhave da akana ikljon an o protestia. – notirinel o Severdžan Memišovski.
Nane lektrikani energia, nane egzistencia, thaj savore džanaja kaj o majšorolo thaj tromalno ancia an i Makedonia si o Roma. Ola salde manipulirinen amencar, sako drom anglal o alusaripa aven amende thaj den amen lafia. Numa salde čuče dende lafia. vakergja o Ramdan Rustemov
