Angleder štar divesa ki romani mahala ” Dudara” an o Zrenjanin – Srbia, o 30 beršengoro Muhamed mudargja pe romnja e Nazira (30).
Premal o lafia tari paše familia i Nazira pe tikne bebea, ali ko komšie ki kafa. Ko jekh momenti paše ko 20 o saati alo odothe i Muhamed kote sine le pištoli thaj pučlja e Nazira dali ka mangel te iranel pe leste khere. Sare mislingje kaj o pištoli si plastično thaj hovavno. Ama o pištoli phajrargja, thaj mudargja e Nazira, a o tikno bebe na sine khuvdo. Palo odova o Muhamed gelo khere thaj korkoro phajrargja peske ko šero thaj mudargja pe.
Akaja tragedia uli angleder štar divesa ki romani zrenjansko mahala “Dudara. Ni jekh taro Roma na geli lenge i godi kaj o Muhamed Emini ka kerel asavko bilačhipa, thaj ka phajrarel ki Nazira ko vakti kana ikerel sine ko vasta e 5 masekongere bebe i tikni Adela. Premal o lafia taro Nazirakere phralja i Nazira sine la 4 čhave taro anglutne prandina thaj i tikni Adela so si lake taro akaja prabdin e Muhamedea, kote na sine oficialno prandime thaj sine olea paše jekh berš.
E Muhamede da sine le 4 čhave taro anglutne prandina. Tari policia ko Zrenjanin, vakeren kaj kerel pe lafi bašo mudaripa thaj korkoromudaripa, thaj i tragedia uli paše ko 20 o saati. Premal o lafia taro javer Roma so dživdinen an i romani mahala “Dudare ” ko Zrenjanin thaj so pendžaren e Nazira thaj e Muhamede, vakerena kaj ni ko agor e gogjake na alo olenge kaj šaj te ovel asavki tragedia. Premal olengere lafia vakeren kaj sebepi so but manglja e Nazira, o mangipa legargja e duj dženen an o limor.
