Bašo deš berša o numero taro sikle thaj o čhave so džana ko avgo klasi si jekvaš kerdo, thaj tiknjardo bašo 50% a odova si soske perel o nataliteti, thaj masovno migarcia e terne paria sar so si tari Strumica thaj Skjopje ikljon tari them te roden majšukar šartia dživdipaske.
Angleder deš berša ko sikljojbaskoro 2006/2007 berš ko trin škole ki komuna Strumica “Kliment Ohridski”, ” Manuš Turnovski” thaj ” Vidoe Podgorec” sine 1.134 čhave so sikljovena sine a persi berš o numero sine 609 čhave. O numero majodorig tikjovela soske sako avutni generacia sisi sa pohari čhave so džan an i škola. Ko sikljojbaskoro 2007/2008 sine hramosarde 160 čhave ko jekhto klasi, a persi berš salde 51.
Ko sikljojbaskiri 2006/2007 berš an i Makedonia sine 231.497 sikle ko sa o klasia. Enja berša palo akava ko sikljojbaskoro 2015/2016 berš ko sa o škole an i Makedonia isi barabutne 185.992 sikle. Pohari tari jekh dekada o numero e siklengoro an o fundavne škole tiknilo bašo 45.000 čhave. Kana o “našavdo ” numero taro čhave hulavel pe aso vakteskoro periodo so legarela pe bašo deš beršpa odova sikavela kote ki makedonia našavgjoven sine 12 čhave ko dive.
