O Muharem Tahirović taro saraevo ko vakti taro mariba sine ki brigada kote majbaro numero olendar sine Roma. Formirimi si panda ko juni 1992 berš kana ki brugada ko jekh momenti sine anavkerdi sar “Kali Brigada”. Avdive sar majbaro kotor tari odoja brigada si bisterdi savorendar. Odoleske na kamel but te kerel lafi bašo mariba, numa del pe godi ko unitariteti so sine an i odoja brigada maškar o askeri.
I storia bašo “Kali brigada” startujnel ko Aneks. I idea so formiringja pe akaja grupa sine te arakhel ple khera thaj familia.
E Muharemea kerel pe sine lafi ko nekanutno Penzienersko ofiso. Odova than sine nekana sar “linia taro hulaviba”. Dengja pe godi kana aven sine agjaar anavkerde “Vikend askeria” Ko bukjarne divesa sine tromale, numa kana avel sine o vikendi na tromana sine te vazden po šero.
Tegani aven sine askeria taro sa o riga, so nane odothar, majbare motivea nekaste te mudarenm- notirinel o Tahirović.
jekh taro majriziko momentia so arakhlja pe o Muharem sine i akcia “Trebević” Na mangel sine but te kerel lafi odole akciake. Kana lipargja pe o anav e akciake ačhilo jekh momenti thaj vakergja salde duj lafia. Poodorig na manglja te kerel lafi.
„ Našti but te vakerav. Sar šaj te vakerav neštoske kana dikhava sar 18 beršengoro terno rupinel učipastar salde ma te mudaren ole” – vakerel o Muharem.
O Muahrem o sasto mariba nakhlja le ki uniforma. Ki brigada nikana na hošingja pe kaj si Rom, thaj kote sine aver da Roma. Savore sine jekh a jekh thaj sine “phralja prekal i šastra”.
O jekhutnipa sine ko sasto vakti e maribaske. I “Kali brigada” sine bisterdi palo maripa sar e Romen, bošnjakon thaj sa o avera.
O Muharem mazumea del pe godi ko okola so na udžargje o agor taro mariba thaj mule ko vakti maribaske.
–Vazdime si desavo monumento -spomeniko bašo mule romane askeria., thaj odothe tergjon salde duj anava. Ni jekh na kergja zori te kerel rodaripa kobor čače Roma mule ko vakti e maribaske – notirinel o Muharem
Ov vakerel kaj na kamel phursakoa numa athinalipa kaj margja pe thaj o Roma da si odothe kaj sine ko mariba e themake.
sar so vakerela ni jekh preperutno tari odoja brigada akana si jali avrial, a olendar 90% si akana čorolikane egzistenciaja.
-Te vakere nekaske kaj sian sine askeri olenge odova nane khanči. A te vakergjan panda kaj sian Rom.. Neko olendar nane len sastipaskoro siguriteto . Našti te džan ko doktori. Okova so sine erati ni jekh na pučela – vakerel o Tahirović.
I edukacia e Romengiri si majbaro problemi tha trubul te kerel pe ko odova – notirinel o Tahirović.
Link: http://faktor.ba/romi-su-bili-dio-armije-bosne-i-hercegovine-gdje-su-danas-momci-iz-garave-brigade/
