Erati ko 4 javinate saste thabile štar socialno barake an i prilepsko mahala “Varoš” kote 4 familie ačhile bizo ple khera.
Sar so vakeren tari mujaljagakiri brigada intervencia kergje 7 vordona, numa na resle te čhinaven i jag ko barake, ama čhinavgje te ovel pobari katastrofa te buvljol i jag ko javer barake so si jekh uzal javer.
Bahtake trujal materialno zijani nane manušikane viktimia. Prekal o informacie taro Stanko Koleski komandiri an i prilepsko PP ko javinakere saatia havljardo sine kaj isi bari jag ko socialno barake ki mahala Varoš. Ola gele intervwencia duj e vordonencar thaj 7 požarnikari , numa sebepi i bari jag ale panda 7 vordona thaj 7 požarnikari. Thabljona sine 2 barake 4 apartmanencar. O objektia si saste tharde barabar e mebelea, ko trin objektia džividinen sine manuša, a ki jekh na. Bahtake na sine ratavrde manuša, thaj kerdo si salde materialno zijani.
