Milja Roma tari Europa ale ki tikni francusko diz sar kotor taro olemgoro beršeskoro adžiluko te den respekti bašo olengoro melaiko.
Sako maj o Roma dromaren an i tikni franciakiri diz Sent Maries de la Mer, ko pašipa taro Avr ki kinara taro Mediterani olengere prikolkencar ko respekto premal i Kali Sara.
Ola ko 24 maj legaren i statua tari Kali Sara dži ko pani an i khangiri kote ki kolona havljaren kaj avela an i Francia.
Aso i legenda oj sine izmekjarka jekh taro trin Maruse, so udžarena o meripa taro Isusm te resel ko regioni Kamarg an i Francia tari Palestina.
Ko desave forme i Kali Sara si taro Upruno Egipet thaj sine kali egipetsko izmekjarka tari Maria thaj o Jakov so dikhle o meripa taro Isus.
Oj esplicitno si lipardi avgo drom taro Vinsent Vavilon ko 1521 berš ko lil “I Legenda baši Sent Maries” kote si notirimi sar “but šukar čoroli dživli so mangel sine devlenge thaj alo dži ki pativ kaj oj sine Romani” . O Roma so ale ki akaja tikni franciakiri diz ka ačhon saste kurko kote trujal i Katolikani khangiri ka keren akava dive thaj ka vizitkeren i lokalno khangiri kote si i statua.
O Roma saatencar ko niče udžaren te astaren i statua, te čuminen la thaj te mangen olatar desavo šukaripa odolea so o mušra grastane vordonencar legarena i statusa si dži ko pašipa e panjeske taro okeani.
O adžiluko si jekhutno religiakoro thaj socialno utsavalkeriba e Romenge tari Europa, kote majbut si Roma tari Francia thaj Makedonia kote kerel lenge šajdipa te dikhen pe te keren loš a po desavo drom thaj te ovel desavi prandin maškar olende.
