Saranda thaj jekh beršengoro kumanovco Robert Maličević si korkoro dat jeri taro šov čhave so si ko baripa taro 8 dži ko 18 berš kote phareste ikljol ko agor dživdipaja.
Nikana na dengja pe godi kote ka avel vakti te hulavel pe taro ple šov čhave kote ko agorutne ofto masekoja arakhela len korkoro, telal aver kher bizi desavi arka.
Lela socialno 50 eura thaj odole lovencar našti kinel ni hajbaske,a sebepi o borči ki prosotria kaj dživdinel 6 masek si bizi elektrikani energia.
Phareste ikljovav ko agor, dali te kinav maro, dali te kinav momoli soske nane man elektrikani energia, o čhave mangena tati soba, šudro si, o jevend nesar nakhavgjam taro sa o riga khuvel šudro, mangav neko te del man arka – vakerel o Robert Maličević.
Ov khedela plastično ambalaža numa odolestar astarel salde 15 eura ko masek, soske buteder da keren asavki buti sebepi egzistencia.
Po desavo drom kerel nesavi aver sezonsko buti numa avere rigatar rizikujnel odolea so mukhel e čhaven korkoro khere. Duj olendar isi len intelektualno bariera, thaj ni jekh na džala ki škola.
O kher nane mlo, ov si me dajoskoro, thaj dživdinav ki jekh soba, sare sovaja ko jekh jatako jekhe kebaja sare učhara amen, thaj mangava dži kote šaj i them te del arka bašo čhave thaj mange , te kina hajbaske, konduria, thaj te bešav javerthe, soske mo dajo vakergja kaj cvaljani akava nilaj te ikljovav taro o kher thaj te džav javer thaneste., a mande nane man javer kher – vakerela ov.
