I diz Pazardžik an i Bugaria na mukhel te legarel pe Hidžab, šej so učharel o muj e džuvljakoro, kote o lokalno legaripa mangel te tiknjarel o tenzie maškar sasoitne grupe thaj te bajrarel o nivelo taro siguriteti havljarel i Al Džezira Balkan.
Akava embargo teloikergje o političaria taro diferentno opcie e dizjake kote isi la paše 70.000 dizutne , kote o legariba Hidžab ulo normalno kotor tari garderoba maškar o muslimania so si preperutne maškar o Romano nacionaliteti.
– Na kamav te šunav pobut kote i diz Pazardžik si than kote ka legarel pe hidžab. Kamav te vakera kote amen na siem asavke, numa siem diz taro džovaplime manuša so konektirinen pe averencart, vakergja e dizjakoro šerutno Todor Popov ko nacionalno radio.
O muslimania si paše 12 procentia taro dizutne an i Bugaria, a o preperutne tari akaja religia si majbut etnikane Khoraja kote o džuvlja majbut na legaren akava hidžab so učharel o muja.
O Popov vakergja kote ko na ikerel pe ko akava dekreti ka ovel lovencar globime. I policia akcentirinela kote akava dekreti si sebepi majsig identifikacia.
Anglutne akava masek , o bugarsko Patriotsko fronti , i partia so teloikerel e prezidente Bojko Borisov, bahamkergja nevo akti an o Kanoni kote nane te mukhel pe ko javno thana te legarel pe hidžab. sar šerutno faktori si potencialno daravina naši nacionalno siguriteti.
