An i Hrvatska ko momenti studirinen 29 Roma, a majbaro kotor taro Roma nane len agorkerdi em fundavno škola.
Jekh olendar so kamel te agorkerel pli edukacia si thaj i Marisa Oneti, so si 4 klasi an i medicinsko škola
” Kamav te džav majodorig me edukaciaja, thaj te dav araka e manušenge”- vakerel i Marisa.
Oj si jekh taro 40 zagrebsko romane stipendistia. Olakoro idoli si i 39 beršengiri Nura Ismailovska, so magistriringja farmacia, thaj si jekhto Romano džuvli an Hrvatska so si la fakultetsko diploma.
” Sium sine šukar siklo, an i fubndavno, maškarutni škola thaj ko fakulteti bašo farmacia thaj biohemisko profesia”. Akana kerav buti sar šerutno farmacevti an i apoteka. Pali olakiri iniciativa i Marisa reslja dži ki stipendia.
Ko momenti isi 5.000 Roma so nane ki buti, a olendar si 5 fakultetsko diplomaja. Numa o kompanie kana dikhen kaj si Rom, na mangen te den len buti. Ki Hrvatska oficialno isi 17.000 Roma, numa na oficialno duj drom majbuter.
