Amaro romano fudbalsko dijamanti Emil Abaz so khelel ki junor timi taro belgisko šampioni Anderleht, thaj ko jekh standardno an i terni reprezentacia tari Makedonia erati ko ½ finale tari LŠ mujal o londonsko Čelzi khelgje interesno meči bašo finale. Numa o terne fudbaleria taro Čelzi sine pošukare thaj margje 3:0. Trubul te akcentirinel pe trujal o našavdo meči taro Anderleht, amaro romano fudbalsko biseri Emil Abaz khelgja o saste 90 minutia akale mečeske thaj sine majšukar individualco taro Anderleht. Trujal odova o Abaz sine le nekobor šukare akcie, asistencie a ko dujto 45 minutia e mečeske sine le thaj šansa te del goli so bibahtake na reslja te del o goli ko anglisko timi.
O Emil Abaz taro 2015 berš khelel ko ternegoro timi taro Anderleht thaj dži akana khelgja pobuter meči akale timeske. Ov taro persi berš si standardno thaj ki terni reperezentacia e Makedoniake, kote angleder duj kurke ko meči mujal o Finska dengja thaj goli. Trubul te lipara kote amaro Rom. Emil Abaz dži angleder 3 berša khelel sine e belgisko reprezentaciake dži ko 15 berša, kote palo odova angja decizia te khelel ko dresi tari makedonikani reperezentacia.
