Sebepi o meripa taro pendžardo etnologo em profesori Dr Trajko Petrovski ko Muzeo e Makedoniakoro ko 12 avgusti ko 12 o časo ikergja pe Komemoracia.
Odothe sar so sine akcentirime taro o manuša so ale kaj ki Komemoracia na sine but manuša . Odova sine notirime tari rig kaj o Roma na džanen te moldinen o baripa akale manušengere. Agjaar sine em e rajoja Abdi Faik, o Šaip Jusuf, i Esma Redžepova Teodosievska em akana e profesorea Dr Trajko Petrovski. Bašo o aktia so kergja o Trajko Petrovski lafikergja o magistranto Daniel Petrovski. Ov anglal o misafiria vakergja kaj but si kuč em barvalipe odova so kergja o Trajko Petrovski sar so si o aktia ki etnologia, tradicia, historia, kultura em čhib.
Sar so vakergja o Daniel Petrovski odola aktia si but barvale so i Romani jekhin valjani te arakhen olem em te keren majodirga buti ko odova. O Trajko Petrovski mukhlja pali peste panda na editirime aktia so ko sig vakti ka oven editirime a odola si siljojbaskere lila romane čhavenge so dđana ki fudavutni škola taro trinto dži ko pandžto klasi. O Trajko Petrovski mulo ko 6 avgusti ko Beograd, R.Srbia.
