Ko XI-to Kongreso taro IRU , so ka ovel ko Skopje taro 26 dži ko 29 Mart akava berš ko čačutno fakti e lafeske taro organizacisko aspekto , vazdingja e romane nacia „ko pire“.
Havlajrde si kaj ka aven paše 100 IRU membrora thaj delegatora , em 50 aver uče misafiria.
Numa okova so na sine pakjajbaske, akana šaj lokheste te ovel.
E lumiakoro šampioni ko boksi ki phari kategoria so akava vikendi reslja te lel akaja tutula o Tajson Fjuri šaj lokheste te ovel ov da ko akava Kongreso.
Olea ko intenzivno kontakto em lafikeriba si o majphureder membro ko IRU tari Bari Britania thaj Presidento ki Demokrtasko Tranzicia o pendžardo romano aktivisto o Grattan Pukson.
Ov si ko intenzivno kontakto e PR ofisoa em e korkoro šampionea taro Tajson Fjuri te avel ko Skopje.
Te sine lačhe o terminia em te na sine le nesave importantno aktivitetoa but lokheste šaj o Tajson Fjuri te ovel kotor taro XI-to IRU Kongreso ko Skopje.
Aso nesave havljarina ko majsiga vakti ka iskristalizirinen pe o momentia em te džanel pe majbuteder dži kote si i procedura bašo oleskoro eventualno aviba ko Skopje, informirinel o portalo Roma Times.
