O našutne taro maripa an o Kosovo so dživdinen an i Makedonia taro 1999 berš, havljaren protesti anglal o UNHCR, soske nane čale taro šartia sar dživdinena. Ola vakeren kote an o socialno apartmani bašo teleperavdi kategoria manuša an o Vizbegovo, trujal o Skopje thanjarde si 20 familie thaj dživdinen paše 120 manuša (nekanutne dživdutne taro kampo bašo našutne) kote jekvaš olendar si čhave. Isi šovardeš čhave so si ki školsko baripanuma salde deš olendar sako dive pirencar prekal o nive džana po pandž kilometria ki škola ko Šuto Orizari, soske an o Vizbegovo isi edukacia salde dži ko 4 klaso fundavno škola O Musli Šakiri koordinatori e Emigrantsko komiteteske bašo Roma, Egipkjania thaj Aškalie taro Kosovo so si navakteske thanjarde an i Makedonia baši CIVIL Media vakeren kaj dživdinen 16-17 berša an i Makedonia a olengoro statusi panda nae definirime.
Ov rodel taro institucie te den len dokumentia thaj statusi sar Citizen an i Makedonia. Premal o Šakiri kana resle o socialno apartmania an o Vizbegovo, verbalno vakerdo si olenge taro Ministeriumi bašisociala thaj taro UNHCR kaj ka pukjinen i elektrika premal odova kobor lena socialno – “kobor jekh kutija cigare thaj upaljači”
Numa o vakerdo nane kerdo, o emigrantia taro Kosovo so si thanjarde an o kamp centari resen socialno 3.300 denaria a okola so si thanjarde ko privatno khera hari pobut taro 5.000 denaria. Paše sa o emigrantia si len problemi izvršpitelencar sos isi len borči baši napukjimi elektrika. O Šakiri vakerel kaj ola našti pukjinen i elektrika soske isi len socialno arka paše 50 eura a i elektrika si 100 – 150 eura ko masek. Ov dopherel kaj isi emigrantia so na len nisave love tari them, ake paše 2-3 berša sebepi birokratsko problemia.
“Džanela pe kaj akava apartmani si pilot proekto so nane majšukar šartencar soske but bukja ikljon sar problemia,but bare smetke baši struja, kondenzacia, nane transporto e čhavenge dži ki škola odola si problemia..” E sastipaskiri protektiva panda but aver bukjaisi akate. Avri taro kampo ko privatno khera e manušen si len problemia e rentaja sebepi so naden ko vakti o socialno love so harinel thaj duj masekoja.
