„Jevendaske nane amen elektrika, nialeske nane amen pani. Sako drom anglal alusariba o političaria avena thaj hohaven amen , kana ka nakhen o alusariba, nikote nane olen” vakerel jekh Romni taro bitolsko Bair e žurnalistkake, so geli te dikhel si li palo pandž čhona kerdo khanči pali editiriba taro CIVIL kaj o manuša taro Bairi deceniencar dživdinen bizo pani pijbaske.
Aver Romni tari akaja čoroli mahala dopherel kaj e dizjakoro šerutno tari Bitola i Nataša Petrovska dengja len lafi kaj ka kerel sa te faislakerel pe o problemi e elektrikaja thaj e panjea. „I Nataša dengja men lafi kaj ka kerel sa te šaj ovel amen pani. Numa akana panda hari ka aven o alusariba kamav te vakerav e Natašake te dikhel amen thaj te faisalkerel akava problemi , thaj te nakergja , ma te bičhavel nikaste akate te vakeren kaske te da amari vota , soske sar ka aven, agjaar ka džan peske. An o Bairi niko nane te ikljol te del piri vota” vakerela oj.
„Angleder o alusariba avena thaj hohaven amen te dengjem amari vota , ka faisalkeren o problemi e panjea thaj dena amen po 500 denaria te da amari vota. Soske te dav miri vota bašo 500 denaria?” vakerel jekh Rom taro Bairi so kamel sine te ačhol anonimno.
O Roma vakeren kaj nekobor droma blokiringje o drom e themake thaj e komunake te šaj šunen olengere problemia.
„An i škola mukha e čhaven te džan džuvencar , soske nane amen pani te nangjara olen ” vakerela jekh holjami daj.
Angleder pandž čhona , an o 6 novembro 2018 berš kotor taro timi taro CIVIL barabutne e civilno žurnalistoa visitkergje i mahala Bair thaj kergje dikhiba e dizjakere šerutnea tari komuna Bitola, i Nataša Petrovska thaj e direktorea taro JKP Vodovod , Goran Kozarov so vakergje kaj džanen akava problemi thaj keren zori te faisalkeren ole.
Numa thaj palo nakhle pandž čhona kana o CIVIL havljargja o problemi so isi e Romen taro Bairi , nane panda nisavi reakcia taro lokalno thaj centralno legaripa. Čače li o Roma taro Bairi gejnen pe salde sar votibaskiri mašineria?!
Youtube: https://www.youtube.com/watch?v=kcxah0sRqTw
