I legenda so notirinel i konekcia maškar o Roma thaj i bavlal. Ko nakhlo vakti i bavlal e Romenge anela sine bari bibaht.
Jekh drom but ko purano vakti jekh Rom chidingja ko dur droma pe familijaja baši egzistencia. Sine but trušale thaj na sine len pani pijbaske thaj ačhile trujal jekh bunari ko jekh gav te šaj pien pani. Taro jekh drom iklilo zoralo Kham , thaj o Rom čhivgja po vast ko plo te šaj ko rahati te piel o pani ma te smetinel ole o kham. . Palo odova ov pe familijaja chidingja o drom majodoriga. Taro jekh drom o Kham vakergja leske: ” Soske na seljaminkjergjan man?”.
O Rom ironijaja vakergja: ” A so sian odokhare tu baro pa trubul te seljaminkerav tutNa dikhe deka smetine man?!”
O Kham ko akala lafia panda pobuter holjandilo em vakergja: ” Šukare akana ka dikhe kobor ka pekav em ka ovel tuke baro tatipa. Ka rode pani!”
Ola chidingje po drom, a o Kham asandilo em panda majzorale takjarela sine.
Numa ola angleder phergje pani pi čuturka panjea taro bunari. O Rom asandilo irangja pe premal o Kham em vakergja leske: ” Sa si lačhe salde ma te phudel i bavlal”
Dromaren sine ola agjaar dur dureste pe droma taro gav ko gav tari diz ki diz. thaj nakhlja but vakti. Ola resle ko jekh gav gele ki dukjana te šaj kinen šeja ko puranipa soske avel sine o jevend. O jevend taro jekh drom iklilo angleder lende.
E jevendaske da na manglja šukar dive sar seljami . I Jevend holjangja thaj zapučlja le: ” Soske na seljaminkergjan man?” O rom dengja la džovapi sar e khameske ” Savi dama sian tu pa trubul te seljamnikerav tut?” ” Na dikhe li kaj smetinea men! Šudro amenge! Oj šundo akava džovapi holjangja em vakergja leske: ” Pazin so kereja lefai em ka dikhe kobor bari dama sium me kana ka resen tut o bare iva!”
O Rom salde vastea sikavgja lake kaj na daral olatar em pe familijaja thavdingja piro drom pali egzistencia.
Trao jekh drom pelo baro iv a o Rom ni tegani na darandilo soske angleder kingja peske šeja tari dukjana ma te ovel olenge šudro ko jevend.
O Rom asandilo em vakergja: ” Šukar si salde ma te avel i bavlal!”.
Ola gele pe droma tromale te dromaren numa an o sig vakti ktaro dural dikhlja sar avela bari bavlal. Panda dur sine i Bavlal kana o Rom vazdingja učeste po vast lelja po šeširi em seljaminkergja e Bavlala thaj dengja bari vika ” Šukar Dive Bavlal”. I Bavlal asandili leske em thavdingja te phudel zorale numa trujal oleste em nakhavgja le.
Link: http://romi.hr/zanimljivosti/hrvatska/rom-i-vjetar
