An o Facebook profilo o ex premieri Nikola Gruevski pali kaste sine editirimo rodaripa te šaj džal an o phanlipa duj berša si hramosardo kaj si ov an i Budimpešta thaj rodela politikano azili tari Ungaria.
„Ko agortune nekobor divesa resle mange baro numero daravina prekal miro dživdipa. Me sium akana an i Budimpešta rodingjum politikano azili tari Ungaria . Sako drom ka ačhovav pativalo e kauzake tari Makedonia. Nikana nane te džav aver drumoi” hramosargja o Gruevski an o Facebook.
Akava sine havljardo an o verificirimo FB profilo taro Nikola Gruevski , kote ov anglutne da editirinel sine pire statusia.
Nane panda oficialno notacie taro makedonikano legaripa thaj tari ungariakiri ambasada an o Skopje kote čače o Gruevski si an i Budimpešta thaj kaj odori rodingja politikano azili.
O presidento e Kriseske Ivan Đolev bašo mediumia vakergja kaj o duj pasportia o personalno thaj o diplomatsko taro Nikola Gruevski si an o Kriso panda taro persi berš sar konsekvenca e akteske Titanik kote sine došalo a o SJO rodingja a o kriso akceptiringja odova rodaripa.
