Štar divesa phanlipa an o Štip baši čordi jekh tikni kolica kašta. Akava sine ando akti so reslja e Rušide taro Berovo, sebepi o nanipa thaj efta bokhale muja taro oleskere čhave kergja akava akti te šaj te takjarel pire familia.
-Jekh tikni kolica čorde kaštencar astargja man jekh manuš em hramosargja mange globa taro 4.000 denaria (65 eura) thaj bičhavgje man anglal o Kriso. Jekhe kurkeske ikljiljum anglal o Kriso thaj vakergjum kaj nane man love te pukjinav em bičhavgje man an o phanlipa em uđarav sine ko nive, a te valjani te takjarav mire čhaven, me palem ka kerav odova – vakergja o Rušid Demirovski.
Enja dženengiri familia Demirovski beršencar dživdinela ko socialno čorolipa., a o socialno suporto našti učharel sa okova so trubul. Akaja familia nane ni an i lista so šaj te istemalkerel i nacionalno kujna, thaj na lel themakoro suporto bašo trinto čhavo. -Phare dživdinaja, trubul varo, maro – vakerel i Sanela Demirovska.
Arakhle si bizo khanči, ola rodena savi te ovel humanitarno suporto.
-Trubul amenge love, menie, jakne so si len te den amen te legaren amare čhave – vakerel o Rušidi.
Taro Centro socialno bukjenge an o Berovo vakerena kaj rodena forme te den suporto akale familiake thaj te konektirinen olen e nacionalno kujnaja.
Numa an o momento an o Berovo i nacionalno kujna isi 31 familia so den lenge 77 obrokia, a i familia e Rušideskiri thaj pandaduj e butčhavengere familienge nane hajbe.
Notirime si kaj akale masekoske ka rodel pe bajraripa e obrokonge so dena pe an i nacionalno kujna resarinaja te čaljaren pe o 110 džene so len socialno suporto.
Dži kote i them rodela forme em modalitetia te iranel o paradosko e sistemeske thaj o numero e familiengoro te na ovel barikada te resen hajbe, udžarel pe an i reakcia e humano persone teden suporto e familiake Demirovski.
link: http://www.televizijastar.com/2018/01/03/%D0%B7%D0%B0
