E dizjakoro šerutno e Skopjeske , Petre Šilegov notiringja kjote an o budžeto e dizjake Skopje e beršeskeso avela ka khuvel o akti te den pe love an i edukacia neve odžačarenge.
– An o Skopje si evidentirime salde 8 odžačaria so si but hari jekhe dizjake so si la baro numero khera so takjona an o kašta. Akava si jekh taro aktia so mangaja o odžakia ničale te užaren pe so majčačheste šaj thabljona o kašta thaj ka tikjnarel pe i toksičnost – vakerel o Šilegov.
Aso kerdi studia an o skopsko regiono isi 52.312 khera so takjona an o kašta so si barabutne 40,4% taro numero khera, 860 khera si len pečke an o peletia -brikete thaj 149 si len pečke an o angara so si 0,9%.
Dikhindo aso o komune an o Saraj 94,6% taro khera takjaren pe an o kašta, an o Šuto Orizari 90,2%, Gjorče Petrov – 69%, Butel -54,1%, Čair – 46,6%, Kisela Voda – 44,4%, Karpoš – 13,9%, Aerodrom – 6% thaj Centar salde 1%.
