Khedisalile… Khedisalile o akharde. Šungjovela lafikeribe maškar lende. Soske tane akharde. Khonik nadzanela. Eke taro jekhvar o udara phravgjona thaj khuvena o respektirime. Sare uštena ko pre te den piro sajdipe dzi olende. Bešle ko baši…
– “Amalalen…” Šurjakerda jek taro respektirime.
– ”Šaj pučena tumen soske si akhardo akava khedipe? Soske sijen akharde? Majanglal te dav tumen dzovapija ko akala pučiba, mangava te vakerav tumenge baro ov sasto so ulavgen taro tumaro vakti te oven ko akala dakikija kola so ka hramonen i nevi historija e Romengiri.”
Sarine čutindor šunena e respektirime.
– “Musaj te vakerelpes kaj but vakti amare timeja kergem akaja lista. Sare so sijen akate nasijen akharde biresarinaja. Salde, sijen akharde baši tumaro intelektualno kapaciteto so vazdingenle vaktesa thaj tumare uče siklanencar. Maškar tumende akate isi diplomirime thaj studentija: pravnikja, politikologija, novinarija, sociologija, doktorija, inzenerija, informaticarija, ekonomistija, psihologja…”
Sare šunena sine o šukar keribe lafi taro o respektirime.
– “… Akate, maškar tumende isi dzene kotaro sa o dziakana romane politikane partije. Akaja lista si kerdi bizo te dikhelpe jali khoni sine ki okoja ja ki akaja partija. Na. Akate sijem sare roma. Roma kola so mangaja nevo thaj pošuzjo avutnipe sarinenge amenge thaj napal amare čavenge ja unukonge. Ka kera buti sarine jekh-ka-jekh barabar amenge te ovel pošukar thaj amare avutne generacijenge.”
– ”Amalalen. Sijen akharde sebepeja te oven kotor ko timi kova so ka anel o nevo tajsa. Akana pučava: Ako kaj jekh namangela te ovel kotor taro akava baro timi, molinava tumen keren mange halali so lelum tumaro vakti thaj šaj te dzan tumenge. Khoni nane te vakerel tumenge lafi.”
Šurakerda jek lafikeribe maškar ko dzijani. A sare pučenape, so te keren.
-“Amalalen… Te šunamen…”.
Denda vika jek taro o respektirime. Thaj thavdingja ko plo lafikeribe…
-”Šukar so nijekh na iklisto. Tegani šaj te dza ponodoriga. Amen andem decizija te kerelpe buti upri o romano problemi. O najbaro problemi. A odova tano: te respektirina amen maškar amende.
-Šaj pučena tumen sar ka resarina odova? Arakhlem kote o kraho. Odovaj so kaj jekh lela pobuter, kaj jekh pohari a isi soj khančesa.
-Amalalen. Nakhla odova vakti. Akana SARE KA KERA BUTI SARINENGE AMENGE.”
-”Isi amen kerdi plan programa thaj strategija ko pobuter kategorije te kerelpe buti te vazdelpe o nivelo e romengoro ko poučo nivelo. Ko akala kategorije ka aktivirina tumende, a na gadzen. O Rom – Romeske ka kerel o pošuzjo dzivdipe. O Rom ka kerel pe čaveske o pošuzjo djivdipe.
Amaro timi anda decizija kaj sekoja kategorija ka ovel la piro timi so ka angazirinelpes thaj ola korkoro ka birinen koordinatori ko odova timi andre. Svako timi ka ovel le khedipe jekputi ko kurko. A ko agor taro č’on ka ovel khedipe taro o sa o koordinatorija vi amencar…”
Thaj akhal šurakersalilo…
Šurakersalili i buti keribe baši pošuzjo tajsa e Romengoro.
[Autori: Elvis Hajdar, diplomirimo informatičari thaj ko agorkeribe o magisterska studie ko UKIM-FINKI]
