Isi panda šukar thaj humano manuša trujal so si but raritetno, Ferhat Hodžaj taro Priepolje si jekh olendar. Ov si gazda taro štar furne, em alo dži ki jekh genialno thaj humano idea sar te del suporto okolen so nane len love mareske jali peko humer.
Ov taro ple bukjarne šungja kote but droma avena manuša so nane len love mareske pa odoleske angja decizia te del len o maro bilovengoro.
– But droma avena manuša mukhena po 10 ko than 40 dinaria (0.10 eura ko than 0.30 euro). Džanav kaj lenge phareste so nane len love mareske, odoleske mangav te dav suporto. I idea but vakti si mange an o šero. Akana mangav te implementirinav akaja idea an o realiteto , vakerel bašo mediumia.
Odova aso oleste nane akcia, numa šukar mangin, so ka kerel la kobor so ka valjani.
