– Beršencar dživdina an i dar ko siam čače amen, akana si šajdipa odova problemi te ovel faisalkerdo. Kana startujngja te kerel pe dialog baši Sveta Geri thaj o Piransko zalivi, o Slovencia vakeren sine kote problematično si amari mahala. Aven sine keren sine fotosia, merinen sine sikaven sine mape purane 200 berša kote vakeren sine jite amen siem koto tari Slovenia.
Akana agorkergja i arbutraža a amen panda na džana kaskere siem. Amen na siem ni upre ni tele – holjame notirinel o Josip Balog tari romani mahala Lončarevo komuna Podturen so gejnel 350 džene.
O sasto numero na džanel pe sebepi aktuelno migracia. I mahala si thanjardi ko jekh kilometar distanca taro Podturan. Ko gav vakeren kaj mangen te džanen kaskere themutne si ola. Te pučle pe e manušen ola mangen an i Hrvatska.
– Lačhe si amenge thaj na manga te dža aver thaneste. Akate si amen sa, kher , drumo thaj na valjani aver. Jekhutne so nane amen si buti so na pakjaja kaj o Slovencia ka den amen – vakeren o Roma thaj notirinen kaj i simantra si ko maškar e lenjake Mura aakana sar thavdela a na sar okoja purani mapa angleder 200 jali 300 berša.
–Amende isi amen hrvatsko dokumentia , numa o Slovencia daravkeren amen kaj siem an i teritoria an i Slovenia. Na mangaja an i Slovenia soske siem bijame odothe thaj kama te ačhova odothe. jekhutne šaj te dža te dengje amenge aver lačhe šartia, vakeren o Roma.
