O purane niško Roma pakjana an i Zajde Badži (Zahida Badži) sar piro pejgamberi . I legenda baši Zajde Badži si notirime maškar o Roma tari generacia ki generacia jekh but terni džuvli so pakajala sine an o Devel kerel sine sar izmekjarka ko desavo barvalo Khoraj . I khorani familiasine muslimania thaj na sine lake mukhle te kerel namazi an o kher. Odoleske ka užarel sine o toaleti thaj palo odova kerel sine odothe o namazi.
KO vakti e Bajrameske o phuro muslimani kote kerel sine buti gelo an o adžiluko thaj manglja te legarel leske jekh sinija alva, so kergja oleskiri romni so oj vakergja kaj odova našti kerel. Numa kana i gazdarica na dikhlja oj lelja i sinia e alvaja, ujrargja dži ki Meka geli ki džamia kote so kerel sine o phuro po namazi . Mukhlja leske i sinia e alvaja anglal leste, thaj kana vazdingja po šero dikhlja i sinija numa prependžargja kaj si leskiri i sinia.
O Khoraj džanel sine ko šaj te kerel odova thaj kana irangja pe khere akhargja savoren an o kher thaj o izmekaria angja lenge bakšišia. Kana alo o niče e džuvljake ob dengja la i sinia. Oj tegani ujrargja prekal i pendžerka a ov počmingja te vakerel:” Zajde Badži, Zajde Badži (Zahida Zajda – pakjavutni an o Devel, Badži – izmekjarka). Oj ujrardili thaj nikana na irangja pe. Ko than kote peli olakiri menia trujal o Beogradsko Kale isi than sar limori, bizo turbve thaj ploča soske i legenda vakerela kaj na mangel sine te ovel učhardi. Trin droma kergja pe o limor, numa trin puri rumisalilo.
O purane niško Roma pakjana an i Zajde Badži kaj na mangel sine te ovel učhardi soske i Zajde Badži sine dživdo pejgamberi. Sako štartodi thaj kurko o niško Roma tharena momolja thaj po desavo drom hulavena halva. odova keren thaj avdive da.
