An o agorutno periodo, majbut prekal socialno netvorko FB thaj aver, startujngje agjaar anvkerde “In live” komunikacia em prezentacia an o pire FB profilia. Majaktivno olendar si Daniela Irina Hamidović Magueranu kote bukvalno “bombardiringja” o FB pire presentacia akale WRF organizacijaja thaj o “Kongreso so trubul te ikerel pe an i Budimpesta ko 18 juni akava berš!
Sar notirmo Presidento akale World Roma Federation – Lumiakiri federacija e Romenge , aso olende notirmo si o Jamie Sztojka.
Sa si ok, em lačhe kana biangjovela nevi romani organizacia – asociacia ko kamel te kerel aktiviteto pe Roma an i Lumia. I Internacionalno Romani Unia – IRU akava akto dikhela sar lačho momenti thaj demokratsko proceso em aktiviteto.
Ko aktiviteto thaj keriba o Kongreso an i Budimpesta si notirime an o 18 juni thaj si bičhavde aplikacie – formulari, vaš manuša so kamen te len than an o akava Kongreso.
Sa si lačhe thaj ok, numa si nekobor pučiba, so šaj anel konfuzia pe Roma an i Lumia.
O IRU kamel te pučel nekobor momenti!
Majnagalal te kamel o World Roma Federation te kerel aktiviteto, trubul te sikavel ko si ola čače. Odova kamel te del piri personalno idetifikacia akale organizaciake. Odova si:
Kote si registririmi akaja organizacia?
Ko si o manuša so keren iniciativa vash i registracia? (anava, persone)
Si le li e World Roma Federation piro logo, štembili sar legalno organizacia?
Si li e World Roma Federation – piri programa, Statuto thaj aver dokumentia?
Te si len sa akala parametria, ko si odova Ofiso taro fundiriba – osnivatelia akale organizaciake?
Sar legalno Organizacia so kamel te kerel Kongreso, trubul te ovel legalno thaj validno!
Isi but aver pučiba so incirinene konfuzia pe Roma ani Lumia. Odola si:
Soske bićhaven aplikacia e manušenge so kamen te len than an o odova Kongreso. Dali odola aplikacie majodorig so ka pheren pe taro persone ko diferentno thema, o “organizatoria” akale Kongresoske (Daniela Hamidović. Jamie Sztojka, Jovan Damjanović, Bajram Haliti, Stefan Palison, thaj avera), ka keren peske sar “alibi” te šaj sikavena peste sar “validno” organizacia. Ola šaj sa odola aplikacie taro o manuša so ka pheren te keren kaj si olengere membria, a o aplikantia nane te oven an i Budimpesta ko Kongreso.
O organizatori na vakerela , ko ka učharel o traveling – dromaripa, thaj akomodacia -hotelo, hape, pipe thaj sojbe po hotelo an i Budimpešta? Dali sako ko avel an i Budimpešta pukjinel piro drom thaj akomodacia- hotelo.
Pi kaskiri režia avena o aplikantia an i Budimpešta?.
Jekh si jasno em sigurno. Ni i Irina Hamidović, ni o Jamie Sztojka, Jovan Damjanović, Bajram Haliti thaj avera, nane lenge i intencia te keren konsolidacia e Romenge, numa sa akaja intencia si te keren bari konfuzia, thaj devalvacia e Internacionalno Romane Uniake -IRU.
Odova dikhel pe odolestar so nikote na prezentirinen piri programsko strategia, plano programi bukjake, nane len Statuto, nane len oficialno registracia thaj but aver fundavutne elementia sar organizacia.
Ola čhivgje anav World Roma Federation , soske našti len legalno o anava taro IRU, soske o IRU si legalno organizacia pire Ofisea, Statuto thaj sa elemntia, e e WRF nane la khanči thaj ustemalkeren elementia tari organizacia so si an o Beograd , Srbia taro Jovan Damjanovič a odova si Roma World Organisation. Trubul te notirina kaj odothare o Jovan Damjanović thaj o Bajram Haliti si “garavde mentoria” e Danielake so hramosaren i koncepcia olakere “in live” reakcie, thaj sar so vakeren o Roma o Jovan thaj o Bajram garaven pe palo u “fustano” tari Daniela
Aver importantno momenti si kote o Jamie Sztojka sar presidento kamel upral o dumo taro potencialno aplikantia, te sikavel piri nalegalno zor thaj formirinel desavo Internationalno Kriso sarRomano, kana sako džanel savo bibahtalipa kerdilo o Sztojka pire aktivitetencar an i Amerika upral o dumo e Romenge.
Trujal o validno thaj legalno Romano Kriso so si le ofiso an o Stokholm thaj pire šefe sar so si o Gregor Julson, o Sztojka kamel te kerel desavo “paralelno” Romano Kriso, kote ka kamel e resle aplikaciencar taro Kongreso an i Budimpesta te sikavel kaj ov si o majbaro Krisaro e Romenge!
Aver lafencar kamel te kerel “virtuelno” Kriso, so ka lel odola aplikacie thaj odole aplikaciencar ka sikavel piri zor.
Ko ka del madato “validnost” odole neve krisarenge? I Daniela an o piro “in live” komunikacia akharel manušen taro diferentno thema te oven krisaria. Savi Romani kris tradicia si an i Makedoni, Srbia jali BiH? Savo ka ovel o kapaciteto odole potencialno Krisaria ko timi taro Jamie Sztojka?
Oj javno vakerela kaj ka parunel e IRU? Save si olakere kapacitetia te šaj parunel nekaste? Te sine la late faktia- dokazia em čačipe, soske dži akana ko ple milijarda atakia kerde upral desave persone an o IRU soske dži akana na parungja, na eleminiringja em aver. Ki odoja konotacia ko jekh notiribe o Stevan Palison – Koci so kamel te promovirinel pe sar Krisaro taro Dorino, vakerel kaj ov pire aktiviteta elimiringja akava IRU , thaj o IRU si čordo taro Dorino!
Akana pučena pe savore, savi eliminacia kerda o Koci po akava IRU? O IRU si aktivno thaj si le validno Romano Kriso kaskoro šefo si Gregor Julson, a o Koci kote si? Kote si o Dorino thaj e Kociskoro Kris? Nikote !!! Odoleske akana o Koci atako thaj kamel te khuvel ko akava WRF. Pendžardi thaj standardno šema! O Koci si le dendi phravdi video notacia kote vakerel kaj kamel te ikljol taro Dorino thaj te avel an o akava IRU. Znači ov jekh vakerela a aver kerela. Odole mangipaja te avel ko IRU isi video dokumentacija!
Ola salde anena konfuzia maškar o manuša, thaj salde bilačho vokabulari, nane la aver argumento , fakti dokaz.
Oj samo pherel negativno elementencar e Romen an i lumia.
Odola si nekobor pučipa, so kamel pe te del pe antvorto sa odole manušenge so ka pheren o aplikacie akale kongresoske an i Budimpesta.
Si but naregular elementia, kaj sikavena kote o World Roma Federation si jekh iniciativa taro 4-5 manuša so kamen te oven “zoresa” lideria maškar o Roma! Zoresa keren pe Mesia e Romenge, numa an i “učharin” ola kamen te parunen sa e Romen an i lumia. Džanel pe olengere kapacitetia thaj olengiri “ideologia” so šaj hohaven tikne čhaven, a na e Romen tari lumia.
Sa akava ka putrel sa olengere čačutne mangina thaj olengere aspiracie so kamen ola te keren. O vreme ka sikavel sa olengere čačutne apetitia.
Olnege nane i intencija u jonsolidacia ko Roma, numa olenge si te parunen o IRU.
Pativaja
Gen.sekretari an o IRU
Ramuš Muarem
