O organizatoria e budimpeštansko Festivaleske “Siget” so ka ovel taro 9 dži ko 16 avgust , havljarena barvali programa an o (Sziget), world music stejdži. I programa si formirime te sikaven e hungariakiri scena, selekcia e romane muzikake, neve čerenja thaj okola so dži akana so si majlačhe dikhle an i lumiakoro stejdžo ko nakhle 25 berša.
O jubilarno segmento tari programa – “the best of” than ka len o Goran Bregović e orkestarea bašo bijava thaj pariniba, o najpendžardo klezmeri bendi an i lumia “The Klezmatics”, i duhovito thaj furiozno rusko ska grupa !Leningrad” thaj olengere kolegia ko odova žanro tari Sicilia – Roy Pachi & “Aretuska”, thaj ukrainsko etno bendi “DahaBraha”.
Sar anglutne agjaar akava da berš an o Festivali “Siget” i publika šaj te šunel an o koncertia e romane muzičarenge. O bendi taro John Langan avela taro Glazgow so bašavel mix tari keltsko thaj punk muzika, flamenko thaj i muzika taro Balkano. Lošale ka ovel kana ka bašavel i grupa “La Caravane Passe” tari Francia , i grupa “Electrorumbiao” tari Špania thaj o pendžardo bendi tari kherutni scena an i Ungaria – “Romengo” thaj “Besh o droM”.
O bileto bašo sa akala festivalsko divesa thaj akomodacia an o kampo ko momento si 299 eura.
